Nagbisita ocular sa Nasunog de Majayjay si D. Prudencio de Santos, Alcalde Mayor ng Laguna, upang alamin kung mayroon man lang 500 tributos dito na siyang isa sa mga hinihingi ng Ordinansang Kastila upang ang Nasunog ay maging bayan.

  Pebrero 10 nang mapag-alaman sa ginawang rehistro o padron de los tributantes na 410 ½ ang mga tributos sa labing-isang barrio ng Nasunog de Majayjay.

Barrio	Barangay	Caveza	Tributos
1.  Ylayang Caliaat	San Felipe Santiago	D. Alverto San Juan	19 ½
2.  San Luis	Nra. Senora	D. Francisco Aragon	37 ½
3.  Ybabang Caliaat	San Bernardo	D. Juan Mariano	43 ½
4.  Sta. Barbara	San Mateo Apostol	D. Jose de San Juan	44
5.  Ylayang Nasunog	San Simon	D. Francisco Manuel	39 ½
6.  Ylayang Sto.        Tomas	Sta. Rosa de Lima	D. Domingo San Luis	52 ½
7.  Ybabang Nasunog	San Marcos	D. Ygnacio Luis de la Torre	37 ½
8.  San Roque	San Diego	D. Octavio Juan Nepomuceno	32 ½
9.Ybabang Sto. Tomas	San Matias	D. Gregorio Rivera	32
10. Pananem	San Salvador	D. Alexo de la Concepcion	37 ½
11. Malagoin	San Sebastian	D. Esteban Francisco	34 ½

Idinagdag pa rito ang tributos ng mga solteros, solteras at pinagsamang casados at solteros na nasa kalapit o paligid ng Nasunog de Majayjay:  48 ½

          Pebrero 13 nang magpahayag ng nasusulat na pag-anib ang mga tributantes ng limang barrio ng Nasunog de Lucban na may kabuoang 255 tributos at gayundin ang Barrio Calunorang Nasunog-Bgy. Nra. Sra. del Rosario ng Cavinti na mayroong 43 tributos.  Sila’y malapit sa Nasunog de Majayjay at nang maibsan din ang mga suliraning pang-temporal at pang-espirituwal.

         Oktubre 9 nang pagtibayin ni Gobernador-Heneral Andres Garcia Camba ng Mataas na Pamahalaan ang isang Dekreto na ginagawang Visita ang mga barrio ng Nasunog de Majayjay at ang iba pang nauukol.  Doo’y itinakda niya ang mga Kondisyon upang ang Visita de Nasunog ay maging bayang hiwalay at lubusang Malaya:

•  Pagtatayo ng simbahan, tribunal at paaralan
•  Pagsasaayos ng mga bahay ayon sa pormang itinatadhana ng Capitulo 83 ng mga Ordinansa ng Mabuting Pamahalaan.

        Disyembre 9 nang piliing pagtayuan ng Visita ang ngayo’y tayo ng Poblacion mula sa dalawa pang pinagpiliang lugar: ang mga patag na lugar sa Dambuhala at sa May-lipute.  Ito’y napili sapagkat maraming bukal na di natutuyo kahit tag-araw.

Sa bisa ng nasabing Dekreto ay pinili rin ang mga kaunahang opisyal ng Visita.  Ito’y ginanap sa bahay ni D. Ygnacio Luis de la Torre, sa harap ni Alcalde Mayor Prudencio de Santos ng Laguna at ng kanyang Kalihim Eduardo Valenzuela.